2016 жыл бәрін орын орнына қояды
Нарықта тек маркетингі жолға қойылған компаниялар ғана қалады
Мұндай пікірді сату бойынша жаңашылдықты ойластырып, енгізумен айналысатын Қазақстандағы №1 білікті маман Әсем Күзенбаева айтты. Кәсіпкерлер палатасының астаналық бөлімшесінде сарапшы дағдарыс кезінде сатылымды ұстап тұратын тәсілдерді меңгеру бойынша мастер-класс өткізді.
«Өзімнің сөйлеген жиналыстарымда соңғы бірнеше жыл жүйелі сатуға қатысты түк өзгертпегенімізді байқаймын. ТМД елдері аумағында саннан гөрі сыйақыға, бақсы-балгерге көбірек сенеді. Олардың уақыты өтті. Түйсікке, тәжірибеге ғана сену аз. Жүйе керек. Біз бүгін осы туралы әңгімелестік», – деді Әсем Күзенбаева.
Мастер-класс кезінде кәсіпкер-жаттықтырушы лид (тиянақты тұтынушы) деген кімдер екеніне жеке тоқталды. Жарнаманы қалай сатылымға айналдыруға болатынын, дағдарыс кезінде сатумен айналысудың ерекшелігі, тұтынушы сұранысы түсіп кетсе не істеу керек, сату жүйесі еш көмектеспесе қайту керек, сатушылар тұтынушысын жоғалтпау үшін қалай ынтыландыру шарт екенін айтып берді.
Сондай-ақ Әсем Күзенбаева тиімді сату бөлімін жасақтау үшін қандай тәсілдер қажеттігін айтып, бөлісті.
«Тиянақты тұтынушыларды жазып отыру керек. Солардың бәрімен жұмыс жасау қажет. Бірақ көбіне сату бөлімінің менеджерлері кіммен жұмыс жасау керек-керек еместігін өздері шешіп жатады. Бұл дұрыс емес. Өйткені, біздер басқарушылар сияқты, барлық тұтынушымен қатар жұмыс істеуге ынталандыра білуіміз керек. Клиент – біздің ақшамыз», – дейді ол өз сөзінде.
Оның айтуынша, сатудың көлемін арттыру үшін клиенттің сеніміне кіру керек. SRC-жүйені енгізу маңызды. Ол клиенттермен жұмыс жасауды есептеу жүйесі. Лидтерді тіркеп, клиенттерді нақтылап, сату нарықтарын анықтау, тапсырманы қоя білу мен сараптама жасай білуге үйретеді.
«Жүйе – сату жүйесіне толыққанды талдау жасауға бейімдейді. Сосын алғашқы қоңырау, кездесу, келісім жасаған кездің қайсысында кемшілік барын көрсетіп береді. Бұл жүйе кәсіптің кез келген саласына тиімді. Бірақ менің бақылауым бойынша, қазақстандық кәсіпкерлер бұрынғыдай жалқауланып бұл жүйені енгізуге құлықты емес. Жүйені енгізбейінше, сату бойынша ешқандай нәтижеге қол жеткізе алмайтынын ескермейді», – деп деді Әсем Күзенбаева.
Биыл, дейді сарапшы, кәсіптің көп түрі бойынша сұраныс артпайды. Сондықтан қалыптасқан сұранысқа сай қызмет көрсетіп үйрену керек. Сатылымды түсіріп алмау үшін ықтият болу керек. Қазіргі таңда қазақстандық компаниялар шамасы бар он клиенттің екі-үшеуіне ғана сауда жасай алатын шамада. Олар онның тоғызына сауда жасап үйренулері керек. Осылай жасаса, нарықта дұрыс жұмыс жасай алатын, маркетинг пен сату жүйесі нақтыланған компаниялар ғана қалады.
Пікір қалдыру:
Пікірлер: